İyunun 29-u Gəncənin Nizami Rayon Məhkəməsində ruhani Fəxri İlyasovun işi üzrə keçirilən prosesdə hakim Gündüz Şirinov hökmü elan edib.
Əhli Beyt - - xəbər agentliyinin verdiyi xəbərə əsasən: İyunun 29-u Gəncənin Nizami Rayon Məhkəməsində ruhani Hacı Fəxri İlyasovun işi üzrə keçirilən prosesdə hakim Gündüz Şirinov hökmü elan edib. O, Fəxri İlyasova 3 il 6 ay müddətinə azadlıqdan məhrumetmə cəzası kəsib. İyunun 16-da keçirilən prosesdə dövlət ittihamçısı Əlihüseyn Məmmədov gəncəli ruhaniyə 4 il 6 ay iş istəmişdi.
Məhkəmənin hökmündən razı qalmayan və apellyasiya şikayəti verəcəyini bildirən vəkil Elçin Namazov açıqlamasında deyib ki, Konstitusiya Məhkəməsi gəncəli ruhanilərin ittiham olunduğu Cinayət Məcəlləsinin 221.3-cu maddəsi ilə bağlı qəbul etdiyi qərar artıq qanuni qüvvəsinə minib: “Ona görə də hakim Fəxri İlyasovun ittiham olunduğu 221.3-cü maddəni 221.2 ilə əvəzlədi. Bu isə ədalətsizlikdir. Biz hesab edirik ki, ən pis halda Fəxri İlyasova 315.1-ci maddə ilə iş kəsilə bilərdi. Əslində bu da ədalətsizlikdir. Biz bu gün məhkəmədən hüquqlarını müdafiə etdiyim şəxsin azadlığa buraxılması barədə qərar gözləyirdik. Qərara təəssüf edirəm”.
Fəxri İlyasov bu ilin yanvarında başqa bir gəncəli ruhani Azər Cəbiyevlə Gürcüstana gedərkən, sərhəd postunda həbs edilib. Onlar Cinayət Məcəlləsinin 221.3-cü maddəsi ilə (silahdan və ya silah qismində istifadə edilən əşyaları tətbiq etməklə xuliqanlıq) ittiham olunublar.
Mayın 12-də Gəncənin Nizami Rayon Məhkəməsində hakim Abdulla İsgəndərov Azər Cəbiyevin 4 il müddətinə azadlıqdan məhrum edilməsi barədə qərar çıxarıb. Azər Cəbiyevin də vəkili Elçin Namazovdur.
source : ابنا
