عراقی فوج کے ترجمان "یحیی رسول" نے فرانس نیوز ایجنسی کے ساتھ گفتگو میں کہا کہ جمعرات کی صبح کو صوبہ الانبار کے مرکز الرمادی کے شمال میں ایک کار بم دھماکہ کیا گیا جس کے نتیجے میں، الانبار میں فوج کے ڈپٹی آپریشنل کمانڈر "عبدالرحمان مہدی ابو رغیف" اور عراقی فوج کے دسویں ڈویژن کے کمانڈر "سفین عبدالمجید" جاں بحق ہو گئے۔ انہوں نے کہا کہ یہ دونوں فوجی کمانڈر دھماکے کے وقت الرمادی کے شمال میں واقع الجرایشی علاقے میں سیکورٹی دستوں کا معائنہ کر رہے تھے۔
یہ ایسی حالت میں ہے کہ عراق کے بعض ذرائع نے کہا ہے کہ یہ دونوں کمانڈر الجرایشی کے علاقے میں داعش کے مارٹر گولے کے حملے میں مارے گئے ہیں۔
اس سے قبل الانبار کے آپریشنل کمانڈر "قاسم المحمدی" الرمادی کے البوعیثہ علاقے میں داعش دہشت گردوں کے ساتھ ایک جھڑپ میں زخمی ہو گئے تھے۔
صوبہ الانبار کے مرکز الرمادی پر مئی کے مہینے سے اب تک، داعش دہشت گردوں کا قبضہ ہے۔
صوبہ الانبار کو داعش دہشت گردوں سے پاک کرنے کی کارروائی، فوج، پولیس اور عوامی رضا کار فورس کی مدد سے شروع ہوئی ہے-
source : abna