اہل بیت(ع) نیوز ایجنسی۔ابنا۔ آیت اللہ سید تقی طباطبائی قمی کا آج بروز جمعہ کو نجف اشرف میں مسجد طوسی سے حرم مطہر کی جانب جلوس جنازہ نکالا گیا جس میں مراجع عظام، علماء اساتید اور عوام الناس کی کثیر تعداد نے شرکت کی۔
یہ مرجع تقلید جو چند روز قبل کربلا زیارت کے لیے گئے ہوئے تھے جمعرات کو ائمہ اطہار علیہم السلام کی قبور کی زیارتوں کے بعد دار ابدی کی طرف چل بسے۔
آیت اللہ العظمیٰ سید تقی طباطبائی ان تین افراد میں سے ایک تھے جنہیں آیت اللہ العظمیٰ سید ابوالقاسم خوئی نے اپنی حیات میں مکتوب اجازہء اجتہاد دیا تھا۔
آپ کی رحلت کے موقع پر کل بروز سنیچر کو حوزہ علمیہ نجف اشرف و قم میں عمومی چھٹی کا اعلان کیا گیا ہے۔