مصر کی سرحد پر صیہونی حکومت نے ٹینک تعینات

مصر کے اخبار الیوم السابع کی ویب سائٹ کے مطابق صیہونی حکومت نے مصر کے شمالی علاقے سینا میں فوجی مراکز پر داعش دہشت گرد گروہ کے حملے کے بعد بدھ کی شام مصر سے ملنے والی مقبوضہ فلسطین کی سرحدوں پر ٹینک تعینات کر دیئے- رپورٹ میں بتایا گیا ہے کہ صیہونی حکومت نے اپنی فوج کو بھی چوکس کردیا ہے- ایک صیہونی ویب سائٹ کی رپورٹ کے مطابق صیہونی حکومت نے اپنے فوجی دستے بھی مصری سرحدوں کی طرف روانہ کر دیئے ہیں- اس سے قبل بدھ کی صبح صیہونی حکومت نے غزہ سے ملنے والی مقبوضہ فلسطین کی گذرگاہوں کرم ابو سالم اور نیستانا کو بند کر دیا- واضح رہے کہ مصری فوج نے ایک بیان میں سینا کے علاقے میں سو تکفیری دہشت گردوں کو ہلاک کرنے کا اعلان کیا ہے