امام خمینی (رح) سے عالمی اہل بیت اسمبلی کے کارکنوں کی تجدید عہد

اہل البیت (ع) نیوز ایجنسی ـ ابنا ـ کی رپورٹ کے مطابق اس موقع پر عالمی اہل بیت اسمبلی کے سیکریٹری جنرل حجت السلام والمسلمین اختری، ان کے معاونین، ذمہ دار اہلکار نیز اسمبلی کے دیگر کارکن موجود تھے جنہوں نے حرم امام خمینی (ع) میں حاضر ہوکر امام کے اہداف و مقاصد سے عہد کی تجدید کی اور اس کے بعد بہشت زہرا کے بلاک نمبر 17 میں ـ 1 فروری 1979 کو پیرس سے واپسی پر ـ امام خمینی (رح) کے تاریخی خطاب کے مقام پر بھی حاضر ہوئے اور فاتحہ پڑھ کر آیت اللہ شہید ڈاکٹر بہشتی اور ان کے ساتھ جام شہادت نوش کرنے والے 72 شہداء اور صدر شہید محمد علی رجائی اور شہید وزیر اعظم ڈاکٹر محمد جواد باہنر کے علاوہ آٹھ سالہ مسلط کردہ جنگ کے شہیدوں کو خراج عقیدت پیش کیا۔
اس تقریب کے آخر میں عالمی اہل بیت اسمبلی کے سیکریٹری جنرل حجت السلام والمسلمین اختری نے اپنے مختصر سے خطاب میں عشرہ فجر کے ایام اللہ کی تعظیم و تکریم کرتے ہوئے ایران کی عظیم ملت کی انتھک محنت اور طویل جدوجہد کی طرف اشارہ کیا اور کہا کہ ملت ایران نے ہزاروں شہیدوں کا نذرانہ دے کر طاغوت کی حاکمیت کی بساط لپیٹ لی اور اسلامی اقدار کو اقتدار کے ایوانوں تک پہنچایا۔
انھوں نے امام خمینی (رہ) کی راہ پر گامزن رہنے پر تأکید کی۔