- Xəbər Agentliyinin verdiyi xəbərə əsasən, Millət vəkili Siyavuş Novruzov yerli mətbuata verdiyi müsahibələrindən birində 28 May Respublika Günü münasibəti ilə növbəti əfv fərmanının imzalanacağının gözlənilən olduğunu deyib. Deputat həmçinin həbsdə olan digər siyasi məhbusların da azadlığa buraxılma ehtimalının böyük olduğunu açıqlayıb.
Bəs görəsən 28 may respublika günü ilə əlaqədar əfvin imzalanması nə dərəcədə realdır?. Həbsdəki digər siyasi məhbuslar azadlığa buraxıla bilərmi?
İslaminSesi mövzunu hüquq müdafiəçisi Arzu Abdullayeva ilə müzakirə edib. Hüquq müdafiəçisi bildirib ki, prezidentin ABŞ-dan geri dönməsini gözləyirlər:
“Hüquq müdafiəçiləri növbəti əfv fərmanının 28 may respublika günündə deyil, 10 mayda imzalanacağını proqnozlaşdırırlar. Ancaq həbsdəki digər siyasi məhbusların azadlığa buraxılacağı ehtimalı çox böyükdür”.
Arzu Abdullayevanın sözlərinə görə, növbəti əfvlə islamçı məhbusların da azadlığa buraxılacağı gözlənilir: “Demək olmaz ki bütün siyasi məhbuslar əfv olunacaqlar. Lakin xüsusilə vicdan məhbusu kimi tanınan şəxslərin ilk olaraq həbsdən buraxılma ehtimalı çox böyükdür. Azərbaycan hakimiyyətində belə bir xüsusiyyət formalaşıb. Bir çox siyasi məhbuslar azadlığa buraxılsa da, digərləri həbsdə saxlanılır. Bu addım həmin məhbusların hökumətdən əfv istəməsi məqsədi ilə atılır”.
Hüquq müdafiəçisi qeyd edib ki, siyasi məhbus İlqar Məmmədov barəsində Avropa Məhkəməsinin qərarı var və o mütləq azadlığa buraxılmalıdır: “Mövsüm Səmədov və digər islamçı siyasi məhbusların da azadlığa çıxmasını istəyirik və bunun üçün çalışırıq. Çünki bu insanların günahları sübuta yetirilməyib. Ona görə də böyük ehtimallar var ki, bu insanlar da növbəti əfv fərmanı ilə azadlığa çıxsınlar”.
source : abna24
