13 fevral hadisələrində həbs edilmiş dindar gənclərin barələrində seçilmiş həbs qəti-imkan tədbirinin dəyişdirilməsi ilə bağlı vəkillər tərəfindən məhkəməyə müraciət olunub. Bu gündən həmin müraciətlərə baxılacaqdır. Bu haqda deyerler.org-a gənclərdən birinin vəkili Fəxrəddin Mustafayev məlumat vermişdir. Gənclər haqqında açılmış cinayət işinin istintaqı davam edir, hələ ki, hər hansı irəliləyiş nəzərə çarpmır. Buna rəğmən bütün hallarda yaxın zamanda istintaqın bitəcəyi bildirilir.
    Həbsdəki gənclərin durumlarını normal olduğu deyilir.
    Xatırladaq ki, fevralın 13-də baş verənlərə bağlı həbs edilmiş dindarlar haqqında Yasamal rayon prokurorluğu tərəfindən Azərbaycan Respublikası Cinayət Məcəlləsinin 221.3-cü (silahdan və ya silah qismində istifadə edilən əşyaları tətbiq etməklə xuliqanlıq törədilməsi) və 315.2-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə cinayət işi açılıb. /Deyerler.org/